ഡോക്ടര് അശ്വന് മരണശേഷവും ഇനി സഹജീവികളിലൂടെ ജീവിക്കും
തിരുവനന്തപുരം:ഡോക്ടര് അശ്വന് മരണശേഷവും ഇനി സഹജീവികളിലൂടെ ജീവിക്കു.നാലുപേര്ക്ക് പുതുജീവന് നല്കിയാണ് ഡോക്ടര് അശ്വന്മോഹനചന്ദ്രന് വിടവാങ്ങിയത്. കോഴിക്കോട് മുക്കം കെഎംസിടി മെഡിക്കല് കോളേജിലെ ജൂനിയര് റസിഡന്റ് ഡോ. അശ്വന് (32) ആണ് മരണശേഷവും സഹജീവികളിലൂട ജീവിക്കുക. അശ്വന്റെ കരള്, ഹൃദയവാല്വ്, രണ്ട് നേത്രപടലങ്ങള് എന്നിവ ഉള്പ്പടെ നാല് അവയവങ്ങളാണ് ദാനം ചെയ്തത്. അശ്വന്റെ കരള് തിരുവനന്തപുരം കിംസ് ആശുപത്രിയിലെ രോഗിയ്ക്കും ഹൃദയവാല്വ് തിരുവനന്തപുരം ശ്രീ ചിത്ര ഇന്സ്റ്റിറ്റ്യൂട്ട് ഫോര് മെഡിക്കല് സയന്സസ് ആന്ഡ് ടെക്നോളജിയിലെ രോഗിക്കും നേത്രപടലങ്ങള് തിരുവനന്തപുരം ചൈതന്യ ഐ ഹോസ്പിറ്റല് റിസര്ച്ച് ഇന്സ്റ്റിറ്റ്യൂട്ടിലേ രോഗിക്കും കൈമാറി. കൊല്ലം ഉമയനല്ലൂര് നടുവിലക്കര സ്വദേശിയാണ് അശ്വൻ. അവയവദാനത്തിന് സന്നദ്ധമായ കുടുംബത്തിന് ആരോഗ്യ വകുപ്പ് മന്ത്രി വീണാ ജോര്ജ് നന്ദി അറിയിച്ചു.
ഡിസംബര് 20ന് കോഴിക്കോട് കക്കാടംപൊയിലിലെ റിസോര്ട്ടില് സുഹൃത്തിന്റെ വിവാഹ സല്ക്കാരത്തില് പങ്കെടുക്കുന്നതിനിടെ സ്വിമ്മിങ് പൂളില് കാല്തെറ്റി വീണായിരുന്നു അപകടം. ഗുരുതര പരിക്കേറ്റ അശ്വനെ മുക്കം കെഎംസി.ടി മെഡിക്കല് കോളേജിലും തുടര്ന്ന് മറ്റ് ആശുപത്രികളിലും പ്രവേശിപ്പിച്ചു. ഡിസംബര് 27-ന് വിദഗ്ധ ചികിത്സയ്ക്കായി കൊല്ലം എന്എസ് ആശുപത്രിയിലേക്ക് മാറ്റിയെങ്കിലും ഡിസംബര് 30ന് മസ്തിഷ്ക മരണം സ്ഥിരീകരിക്കുകയായിരുന്നു. തന്റെ അവയവങ്ങള് മരണാനന്തരം മറ്റൊരാള്ക്ക് പ്രയോജനപ്പെടണമെന്നത് ഡോ. അശ്വന്റെ വലിയ ആഗ്രഹമായിരുന്നു എന്ന് ബന്ധുക്കള് പറഞ്ഞു.
