മെസ്സേജും വന്നില്ല, ഒപ്പും വെച്ചില്ല’; അക്കൗണ്ടുകളില്‍ നിന്ന് 35 കോടി അപ്രത്യക്ഷമായി! പി.എന്‍.ബിയില്‍ വന്‍ തട്ടിപ്പ്; ഭീതിയില്‍ നിക്ഷേപകര്‍
നോയിഡ :ബാങ്ക് അക്കൗണ്ടിലെ തങ്ങളുടെ ആയുഷ്‌കാലത്തെ മുഴുവന്‍ സമ്പാദ്യവും ഒറ്റ രാത്രികൊണ്ട് അപ്രത്യക്ഷമായതറിഞ്ഞ് പകച്ചുനില്‍ക്കുകയാണ് ഉത്തര്‍പ്രദേശിലെ ഗ്രേറ്റര്‍ നോയിഡയിലുള്ള ഒരു കൂട്ടം സാധാരണക്കാര്‍. ഗ്രേറ്റര്‍ നോയിഡയിലെ ഐച്ചാറിലുള്ള പഞ്ചാബ് നാഷണല്‍ ബാങ്കിന്റെ (PNB) ശാഖയിലാണ് രാജ്യത്തെ തന്നെ ഞെട്ടിച്ച കോടികളുടെ സാമ്പത്തിക തട്ടിപ്പ് പുറത്തുവന്നത്. അക്കൗണ്ട് ഉടമകളുടെ സേവിംഗ്‌സ് അക്കൗണ്ടുകളില്‍ നിന്നും ഫിക്‌സഡ് ഡെപ്പോസിറ്റുകളില്‍ (FD) നിന്നുമായി ഏകദേശം 35 കോടിയോളം രൂപ തട്ടിയെടുത്തതായാണ് നിലവിലെ പ്രാഥമിക കണക്കുകള്‍ വ്യക്തമാക്കുന്നത്.
ഏറ്റവും ഞെട്ടിപ്പിക്കുന്ന വസ്തുത, തങ്ങളുടെ അക്കൗണ്ടുകളില്‍ നിന്ന് പണം നഷ്ടപ്പെട്ടതായി ഒരു എസ്.എം.എസ് (SMS) മുന്നറിയിപ്പും ഉപഭോക്താക്കള്‍ക്ക് ലഭിച്ചില്ല എന്നുള്ളതാണ്. ബാങ്കില്‍ നേരിട്ടെത്തി പാസ്ബുക്ക് അപ്ഡേറ്റ് ചെയ്യാനോ പണം പിന്‍വലിക്കാനോ ശ്രമിച്ചപ്പോഴാണ് അക്കൗണ്ട് ബാലന്‍സ് പൂജ്യമായി നില്‍ക്കുന്നത് കണ്ട് നിക്ഷേപകര്‍ നടുങ്ങിയത്
പാതയോരത്ത് ചായ വില്‍ക്കുന്ന സന്തോഷിന് നഷ്ടമായത് 1.18 കോടി!
ജീവര്‍ അന്താരാഷ്ട്ര വിമാനത്താവള (Jewar Airport) പദ്ധതിക്കായി സ്വന്തം ഭൂമി വിട്ടുനല്‍കിയപ്പോള്‍ ലഭിച്ച നഷ്ടപരിഹാര തുക ബാങ്കില്‍ നിക്ഷേപിച്ച പാവപ്പെട്ട കര്‍ഷകരും ഗ്രാമീണരുമാണ് ഈ ആസൂത്രിത തട്ടിപ്പില്‍ ഇരയായതില്‍ ഭൂരിഭാഗവും.
സന്തോഷ് (60): ബിറോണ്ട ഗ്രാമത്തില്‍ തയ്യല്‍ക്കടയും ചായക്കടയും നടത്തുന്ന സന്തോഷ് എന്ന വയോധികയ്ക്ക് ഭൂമി ഏറ്റെടുക്കല്‍ വകയായി ലഭിച്ച 1.29 കോടി രൂപ അക്കൗണ്ടില്‍ ഉണ്ടായിരുന്നു. എന്നാല്‍ ഇതില്‍ നിന്ന് 1.18 കോടി രൂപ തട്ടിയെടുത്തതായി കുടുംബം കണ്ടെത്തി.
വിജേന്ദ്ര സിംഗ് (കര്‍ഷകന്‍): തന്റെ അക്കൗണ്ടില്‍ ഉണ്ടായിരുന്നു 88 ലക്ഷത്തോളം രൂപയില്‍ നിന്ന് ബാക്കിയുള്ളത് വെറും 1 ലക്ഷം രൂപ മാത്രമാണെന്ന് കരഞ്ഞുകൊണ്ട് അദ്ദേഹം മാധ്യമങ്ങളോട് പറഞ്ഞു.
ഹനീഫ് ഖാന്‍: 39 ലക്ഷം രൂപയുണ്ടായിരുന്ന തന്റെ സേവിംഗ്‌സ് അക്കൗണ്ട് ഇപ്പോള്‍ പൂര്‍ണ്ണമായും കാലിയായി നില്‍ക്കുകയാണെന്ന് ഹരീഫ് വെളിപ്പെടുത്തി. പണം മാറ്റുന്നതിന് താന്‍ ഒപ്പുവെക്കുകയോ ഫോണിലേക്ക് ഒ.ടി.പിയോ മെസ്സേജോ വരികയോ ചെയ്തിട്ടില്ലെന്ന് ഇദ്ദേഹം വ്യക്തമാക്കുന്നു.
മകളുടെ ചികിത്സയ്ക്കായി പണം തിരക്കിയ സഞ്ജയ്: 12 വയസ്സുള്ള രോഗിയായ മകളുടെ എം.ആര്‍.ഐ സ്‌കാനിംഗിനായി ഫിക്‌സഡ് ഡെപ്പോസിറ്റ് പിന്‍വലിക്കാന്‍ ബാങ്കിലെത്തിയ സഞ്ജയിയോട് എഫ്.ഡി മുഴുവന്‍ ക്ലോസ് ചെയ്ത് പണം പിന്‍വലിച്ചതായാണ് ജീവനക്കാര്‍ അറിയിച്ചത്.
‘ആര്‍.ബി.ഐ ഓഡിറ്റ്’ എന്ന് പറഞ്ഞ് നാളുകളായി കബളിപ്പിച്ചു; സി.സി.ടി.വി പരിശോധന
പാസ്ബുക്ക് പ്രിന്റ് ചെയ്യാനും ബാങ്ക് സ്റ്റേറ്റ്മെന്റ് എടുക്കാനും അക്കൗണ്ട് ഉടമകള്‍ മുമ്പ് പലതവണ ബാങ്കില്‍ എത്തിയപ്പോഴും ‘ആര്‍.ബി.ഐ (RBI) ഓഡിറ്റ് നടക്കുകയാണെന്നും’ ‘മെഷീന്‍ തകരാറിലാണെന്നും’ പറഞ്ഞ് ജീവനക്കാര്‍ ഇവരെ മടക്കി അയക്കുകയായിരുന്നുവെന്നാണ് ഉപഭോക്താക്കള്‍ ആരോപിക്കുന്നത്
ജീവനക്കാര്‍ തന്നെ അക്കൗണ്ട് ഉടമകളുടെ ലോഗിന്‍ വിവരങ്ങളും വ്യാജരേഖകളും ഉപയോഗിച്ച് പണം മറ്റ് ബെനിഫിഷ്യറി അക്കൗണ്ടുകളിലേക്ക് വകമാറ്റിയതാണെന്നാണ് പോലീസ് കരുതുന്നത്. തട്ടിപ്പ് പുറത്തുവന്നതോടെ കര്‍ഷകരും സ്ത്രീകളും അടക്കമുള്ള അക്കൗണ്ട് ഉടമകള്‍ ശാഖയ്ക്ക് മുന്നില്‍ വലിയ പ്രതിഷേധവുമായി ധര്‍ണ്ണയിരുന്നു. തട്ടിപ്പിന്റെ വ്യാപ്തി 100 കോടിയും കടക്കാമെന്ന് ഭാരതീയ കിസാന്‍ യൂണിയന്‍ ആരോപിച്ചു.
മാനേജര്‍ അടക്കം 5 പേര്‍ക്ക് സസ്‌പെന്‍ഷന്‍; പോലീസും ആഭ്യന്തര സമിതിയും അന്വേഷണത്തില്‍
തട്ടിപ്പ് വിവാദമായതോടെ പഞ്ചാബ് നാഷണല്‍ ബാങ്കിന്റെ നോയിഡ റീജിയണല്‍ ഓഫീസ് അടിയന്തരമായി ഇടപെടുകയും ശാഖാ മാനേജര്‍ അടക്കം 5 ജീവനക്കാരെ ജോലിയില്‍ നിന്ന് സസ്‌പെന്‍ഡ് ചെയ്യുകയും ചെയ്തു.
ബീറ്റ-2 (Beta-2) പോലീസ് സ്റ്റേഷനില്‍ വഞ്ചനാക്കുറ്റത്തിന് കേസെടുത്ത് പോലീസ് അന്വേഷണം ആരംഭിച്ചിട്ടുണ്ട്. ബാങ്കിന്റെ ഉന്നതതല ആഭ്യന്തര അന്വേഷണ സമിതിയും ശാഖയിലെത്തി രേഖകളും കമ്പ്യൂട്ടര്‍ ലോഗുകളും പരിശോധിച്ചുവരികയാണ്. ഉപഭോക്താക്കള്‍ക്ക് അര്‍ഹതപ്പെട്ട പണം തിരിച്ചുകിട്ടാന്‍ അടിയന്തര നടപടികള്‍ സ്വീകരിക്കുമെന്ന് പി.എന്‍.ബി ചീഫ് മാനേജര്‍ രാജേഷ് നിഗം അറിയിച്ചെങ്കിലും, മുഴുവന്‍ നിക്ഷേപവും നഷ്ടപ്പെട്ട ഭീതിയിലാണ് പ്രദേശവാസികള്‍.
