പശ്ചിമ ബംഗാളിൽ മോഷണക്കുറ്റം ആരോപിച്ചു പിടികൂടിയ യുവാവ് പോലീസ് കസ്റ്റഡിയിൽ മരിച്ചു.
കൊൽക്കത്ത :മോഷണക്കുറ്റം ആരോപിച്ചു പിടികൂടിയ യുവാവിന പോലീസ്
മർദ്ദിച്ചു കൊന്നതായി ബന്ധുക്കൾ
പശ്ചിമ ബംഗാളിലെ ബിർഭും ജില്ലയിലുള്ള പച്ചിയാര ഗ്രാമവാസിയായ ബർജഹാൻ ഷാ എന്ന 35 വയസ്സുകാരനായ മുസ്ലീം യുവാവാണ് മോഷണക്കുറ്റം ആരോപിച്ച് ദുബ്രാജ്പൂർ പോലീസ് സ്റ്റേഷനിൽ എത്തിച്ചതിന് പിന്നാലെ മരിച്ചത്
സംഭവം പ്രതിഷേധങ്ങൾക്ക് കാരണമായിട്ടുണ്ട്
വ്യാഴാഴ്ച വൈകുന്നേരം ജഷ്പൂർ മേഖലയിലാണ് സംഭവം നടന്നത്. അയൽപ്രദേശത്ത് എത്തിയ ഷായെ മോഷണക്കുറ്റം സംശയിച്ച് നാട്ടുകാർ പിടികൂടി പോലീസിൽ ഏൽപ്പിക്കുകയായിരുന്നു. പോലീസ് സ്റ്റേഷനുള്ളിൽ വെച്ച് ഇദ്ദേഹത്തിന് ക്രൂരമായ മർദ്ദനമേറ്റെന്നും, കൃത്യസമയത്ത് ചികിത്സ ലഭിച്ചില്ലെന്നും കുടുംബം ആരോപിക്കുന്നു. ആരോഗ്യനില വഷളായതിനെത്തുടർന്ന് അദ്ദേഹത്തെ ദുബ്രാജ്പൂർ മൻസാരെ ആശുപത്രിയിൽ എത്തിച്ചെങ്കിലും, അപ്പോഴേക്കും മരണം സംഭവിച്ചതായി ഡോക്ടർമാർ സ്ഥിരീകരിച്ചു.
പോലീസ് സ്റ്റേഷനിലെ സിസിടിവി ദൃശ്യങ്ങളിൽ തന്റെ പിതാവിനെ ക്രൂരമായി കൈകാര്യം ചെയ്യുന്നത് കാണാമായിരുന്നുവെന്ന് ഷായുടെ മകൻ ഇസ്മായിൽ ഷാ ആരോപിച്ചു. വൈകുന്നേരം 6.30-ഓടെ പോലീസ് സ്റ്റേഷനുള്ളിൽ ഷാ അതീവ അവശനിലയിൽ കിടക്കുന്നത് കണ്ടതായി ഷെയ്ഖ് ജഹാംഗീർ എന്ന ദൃക്‌സാക്ഷി പറഞ്ഞു.
തന്റെ ഭർത്താവിനോട് സംസാരിക്കാൻ അനുവദിച്ചില്ലെന്നും, ആധാർ കാർഡ് വാങ്ങിയ ശേഷം ഒരു രേഖയിൽ ഒപ്പിടാൻ ആവശ്യപ്പെട്ടുവെന്നും ഷായുടെ ഭാര്യ അജ്മിറ ബീബി പറഞ്ഞു. ഭർത്താവിന്റെ വായിൽ നിന്നും മൂക്കിൽ നിന്നും രക്തം വരുന്നത് താൻ കണ്ടതായും അവർ വ്യക്തമാക്കി. ശരിയായ ചികിത്സ ലഭ്യമാക്കുന്നതിന് പകരം, പോലീസ് ഈ സാഹചര്യത്തെ ഒരു “നാടകം” എന്ന് പറഞ്ഞ് തള്ളിക്കളയുകയാണുണ്ടായതെന്ന് അവർ ആരോപിച്ചു.
നിഷ്പക്ഷമായ അന്വേഷണവും സിസിടിവി ദൃശ്യങ്ങൾ പരിശോധിക്കണമെന്നും കുടുംബം ആവശ്യപ്പെട്ടു. മോഷണക്കുറ്റം ആരോപിച്ച് തന്നെ മർദ്ദിച്ച ആറുപേരുടെ പേരുകൾ ഉൾപ്പെടുത്തി, ഷായുടെ ഭാര്യാപിതാവായ മുബാറക് ഖാൻ രേഖാമൂലം പരാതി നൽകി. മരണവാർത്തയറിഞ്ഞ് കുടുംബാംഗങ്ങളും നാട്ടുകാരും പോലീസ് സ്റ്റേഷന് മുന്നിൽ തടിച്ചുകൂടി. ആശുപത്രിയിൽ നിന്ന് മൃതദേഹം തിരിച്ചെത്തിച്ചപ്പോൾ സ്ഥിതിഗതികൾ സംഘർഷഭരിതമായി; മോഷണക്കുറ്റം നിയമനടപടികളിലൂടെയാണ് കൈകാര്യം ചെയ്യേണ്ടതെന്ന് ആവശ്യപ്പെട്ട് നാട്ടുകാർ ആംബുലൻസ് തടഞ്ഞ് പ്രതിഷേധിച്ചു.
കസ്റ്റഡിയിലിരിക്കെ മർദ്ദനമേറ്റെന്ന ആരോപണം പോലീസ് തള്ളി. മോഷണക്കുറ്റം ആരോപിച്ച് ഒരു സംഘം ആളുകൾ ഷായെ മർദ്ദിക്കുകയായിരുന്നുവെന്നും, പോലീസ് ഇടപെട്ടാണ് അദ്ദേഹത്തെ രക്ഷപ്പെടുത്തിയതെന്നും അഡീഷണൽ സൂപ്രണ്ട് ഓഫ് പോലീസ് (ബോൽപൂർ) അഭിഷേക് റോയ് പറഞ്ഞു.
സംഭവം അന്വേഷണത്തിലാണെന്നും അദ്ദേഹം വ്യക്തമാക്കി.
മൃതദേഹം പോസ്റ്റ്‌മോർട്ടത്തിനായി അയച്ചു. പോസ്റ്റ്‌മോർട്ടം റിപ്പോർട്ടും സിസിടിവി ദൃശ്യങ്ങളും, പരാതിയിന്മേൽ നടക്കുന്ന അന്വേഷണവും ഷായുടെ മരണത്തിലേക്ക് നയിച്ച സാഹചര്യം
വ്യക്തമാവൂ.
