തിലകം അണിയുന്നവരും ‘ജയ് ശ്രീറാം’ എന്ന് വിളിക്കുന്ന വരുമായ കടയുടമകളിൽ നിന്ന് മാത്രം ദീപാവലി സാധനങ്ങൾ വാങ്ങാവൂ’ വർഗീയ വിദ്വേഷ പ്രസ്താവനയുമായി മഹാ രാഷ്ട്ര മന്ത്രി.
മുംബൈ:മഹാരാഷ്ട്ര മന്ത്രി നിതേഷ് റാണെ, ഹിന്ദു മതവിഭാഗത്തിൽപ്പെട്ടവരോട് ദീപാവലി ആഘോഷങ്ങൾക്കായി സാധനങ്ങൾ വാങ്ങുമ്പോൾ, നെറ്റിയിൽ തിലകം അണിയുന്നവരും ‘ജയ് ശ്രീറാം’ എന്ന് വിളിക്കുന്നവരും ഹിന്ദു പ്രാർത്ഥനകൾ അറിയാവുന്നവരുമായ കടയുടമകളിൽ നിന്ന് മാത്രം വാങ്ങണമെന്ന് ആവശ്യപ്പെട്ടു. വർഗീയ ഭിന്നത വളർത്താൻ ശ്രമിക്കുന്നുവെന്ന് ആരോപിച്ച് പ്രതിപക്ഷ നേതാക്കൾ ഇതിനെതിരെ രൂക്ഷ വിമർശനവുമായി രംഗത്തെത്തി.
ചൊവ്വാഴ്ച മുംബൈയിൽ വെച്ച് ‘ഐ.എ.എൻ.എസ്’ (IANS) വാർത്താ ഏജൻസിയോട് സംസാരിക്കവെ, ഹിന്ദു പാരമ്പര്യങ്ങൾ പ്രകടമായി പിന്തുടരുന്ന കച്ചവടക്കാർക്ക് ഹിന്ദുക്കൾ മുൻഗണന നൽകണമെന്ന് റാണെ പറഞ്ഞു. “ദീപാവലി ആഘോഷങ്ങൾക്കായി സാധനങ്ങൾ വാങ്ങുമ്പോൾ, ‘ജയ് ശ്രീറാം’ എന്ന് പറയുന്നവരും, നെറ്റിയിൽ തിലകം അണിയുന്നവരും, ഹനുമാൻ ചാലിസയോ മഹാ ആരതിയോ ചൊല്ലാൻ അറിയാവുന്നവരുമായ കടയുടമകളിൽ നിന്ന് തന്നെ സാധനങ്ങൾ വാങ്ങണമെന്ന് ഞാൻ ഹിന്ദു സമൂഹത്തോട് അഭ്യർത്ഥിക്കുന്നു,” അദ്ദേഹം വ്യക്തമാക്കി.
ദീപാവലിയോട് അനുബന്ധിച്ച് കർഷകർക്ക് സംസ്ഥാന സർക്കാർ നൽകുന്ന സാമ്പത്തിക സഹായത്തെയും റാണെ പ്രശംസിച്ചു. അർഹരായ കർഷകർക്ക് ആദ്യഘട്ടമായി 5,000 രൂപ നൽകുമെന്ന് പ്രഖ്യാപിച്ചിട്ടുണ്ടെന്നും, ഇത്രയും വലിയ തോതിലുള്ള സഹായം മുൻ സർക്കാരുകളൊന്നും നൽകിയിട്ടില്ലെന്നും അദ്ദേഹം അവകാശപ്പെട്ടു.
പ്രതിപക്ഷ നേതാക്കൾ ഈ പരാമർശങ്ങളെ ശക്തമായി അപലപിച്ചു. അധികാരത്തിനു വേണ്ടി പാർട്ടി മാറിയ ശേഷം ചില രാഷ്ട്രീയക്കാർ വർഗീയ വിദ്വേഷം പ്രചരിപ്പിക്കുകയാണെന്ന് ആർ.ജെ.ഡി എം.എൽ.എ ഭായ് വീരേന്ദ്ര ആരോപിച്ചു. സ്വാതന്ത്ര്യസമരത്തിൽ ഹിന്ദുക്കളും മുസ്ലീങ്ങളും ക്രിസ്ത്യാനികളും സിഖുകാരും ഒരുമിച്ച് പോരാടിയ കാര്യം അദ്ദേഹം ഓർമ്മിപ്പിച്ചു. ഇന്ത്യ ഒരു ഹിന്ദു രാഷ്ട്രമല്ല, മറിച്ച് മതേതര രാഷ്ട്രമാണെന്ന് വ്യക്തമാക്കിയ അദ്ദേഹം, റാണെ തന്റെ പരാമർശങ്ങൾ പിൻവലിച്ച് മാപ്പ് പറയണമെന്ന് ആവശ്യപ്പെട്ടു.
ഒരു മന്ത്രി ഭരണഘടനയെയും താൻ ചെയ്ത സത്യപ്രതിജ്ഞയെയും ഓർക്കണമെന്ന് മുതിർന്ന കോൺഗ്രസ് നേതാവ് വിജയ് വഡെട്ടിവാർ പറഞ്ഞു. മനഃപൂർവം മതപരമായ ഭിന്നതകൾ സൃഷ്ടിക്കാൻ റാണെ ശ്രമിക്കുകയാണെന്നും അദ്ദേഹം ആരോപിച്ചു. കടയുടമയുടെ മതത്തേക്കാൾ ഗുണനിലവാരത്തിനും വിലയ്ക്കുമാണ് ആളുകൾ മുൻഗണന നൽകുന്നതെന്നും, ഇത്തരം ആഹ്വാനങ്ങൾ ഉപഭോക്താക്കളെ സ്വാധീനിക്കുമോ എന്നും മുൻ കോൺഗ്രസ് എം.പി ഹുസൈൻ ദൽവായി ചോദിച്ചു.
