റെയ്ഡുകൾക്കിടയിൽ കണ്ടെത്തുന്ന സ്വമേധയായുള്ള ലൈംഗികത്തൊഴിലാളികളെ ഇരകളാക്കാനോ കസ്റ്റഡിയിലെടുക്കാനോ പാടില്ലെന്നും സുപ്രീം കോടതി.
ന്യൂഡൽഹി: റെയ്ഡുകൾക്കിടയിൽ കണ്ടെത്തുന്ന സ്വമേധയായുള്ള ലൈംഗികത്തൊഴിലാളികളെ ഇരകളാക്കാനോ കസ്റ്റഡിയിലെടുക്കാനോ പാടില്ലെന്നും സുപ്രീം കോടത’
ഇമ്മോറൽ ട്രാഫിക് (പ്രിവൻഷൻ) ആക്ടിലെ (ഐടിപിഎ) വ്യവസ്ഥകൾ സ്വമേധയാ ലൈംഗികത്തൊഴിലിൽ ഏർപ്പെടുന്ന പ്രായപൂർത്തിയായവർക്കെതിരെ നടപടിയെടുക്കാൻ പോലീസിന് അധികാരം നൽകുന്നില്ലെന്ന് സുപ്രീം കോടതി. ലൈംഗികത്തൊഴിൽ എന്ന പ്രവൃത്തി സ്വയം നിയമവിരുദ്ധമല്ലെന്നും കോടതി വ്യക്തമാക്കി. വേശ്യാലയം നടത്തുന്നത് നിയമവിരുദ്ധമാണെങ്കിലും, റെയ്ഡുകൾക്കിടയിൽ കണ്ടെത്തുന്ന സ്വമേധയായുള്ള ലൈംഗികത്തൊഴിലാളികളെ ഇരകളാക്കാനോ കസ്റ്റഡിയിലെടുക്കാനോ പാടില്ലെന്നും കോടതി കൂട്ടിച്ചേർത്തു.
സുപ്രീം കോടതി
ജസ്റ്റിസ് ജെ.ബി. പാർദിവാല, ജസ്റ്റിസ് ആർ. മഹാദേവൻ എന്നിവരടങ്ങിയ ബെഞ്ചാണ് സ്വന്തം ഇഷ്ടപ്രകാരം ലൈംഗികത്തൊഴിലിൽ പങ്കാളികളാകുന്ന പ്രായപൂർത്തിയായവരെ പീഡിപ്പിക്കുന്നതിൽ നിന്ന് പോലീസ് വിട്ടുനിൽക്കണമെന്ന് വ്യക്തമാക്കിയത്. ഇത്തരം സ്ത്രീകൾ സ്വന്തം ഇഷ്ടപ്രകാരമാണ് ലൈംഗികത്തൊഴിലിൽ ഏർപ്പെടുന്നത് എന്നതിനാൽ, അവരെ ‘രക്ഷപ്പെടുത്തുക’ എന്ന ചോദ്യം ഉദിക്കുന്നില്ല എന്നാണ് കോടതിയുടെ ലളിതമായ യുക്തിയെന്ന് ലൈവ് ലോ റിപ്പോർട്ട് ചെയ്തു.
ഒരു ലൈംഗികത്തൊഴിലാളിയെയും അവരുടെ ഇഷ്ടത്തിന് വിരുദ്ധമായി പുനരധിവസിപ്പിക്കരുതെന്നും പുനരധിവാസ പ്രക്രിയ നിർബന്ധിത സ്വഭാവമുള്ളതാകരുതെന്നും അത് അവരുടെ സ്വമേധയായുള്ള തീരുമാനമായിരിക്കണമെന്നും കോടതി പറഞ്ഞു. പുനരധിവാസത്തിനായുള്ള ഭരണഘടനാപരമായ അവകാശം ഇരകൾക്ക് നൽകാനും അതിനുള്ള മാർഗ്ഗങ്ങളും പിന്തുണയും ഉറപ്പുവരുത്താനും ഭരണകൂടം ബാധ്യസ്ഥരാണ്. എന്നാൽ, ഇരയുടെ ഇഷ്ടത്തിന് വിരുദ്ധമായി ഒരു പുനരധിവാസം അവരുടെ മേൽ അടിച്ചേൽപ്പിക്കാൻ ഭരണകൂടത്തിന് അധികാരം നൽകുന്നില്ലെന്നും കോടതി വ്യക്തമാക്കി.
മുതിർന്ന ലൈംഗികത്തൊഴിലാളികളുടെ പുനരധിവാസം, പുനഃസംയോജനം, സംരക്ഷണ കേന്ദ്രങ്ങളിലെ താമസം എന്നിവയുമായി ബന്ധപ്പെട്ട തീരുമാനങ്ങളിൽ അവരുടെ സമ്മതത്തിന് വേണം പ്രഥമ പരിഗണന നൽകാനെന്ന് സുപ്രീം കോടതി വിധിച്ചു. വാണിജ്യപരമായ ലൈംഗിക ചൂഷണത്തിനായി കടത്തപ്പെടുന്ന ഇരകളുടെ മൗലികാവകാശങ്ങൾ സംരക്ഷിക്കുന്നതിനുള്ള മാർഗ്ഗനിർദ്ദേശങ്ങൾ ആവശ്യപ്പെട്ട് സമർപ്പിച്ച ഒരു ഉപഹർജി പരിഗണിക്കവെയാണ് കോടതിയുടെ ഉത്തരവ്. ഇരകളുടെ സംരക്ഷണ പദ്ധതി തയ്യാറാക്കുന്നത് സംബന്ധിച്ച് മുതിർന്ന അഭിഭാഷക അപർണ ഭട്ട് സമർപ്പിച്ച നിർദ്ദേശം സ്വീകരിച്ച കോടതി, ഇരകളെ വെറുമൊരു രക്ഷപ്പെടുത്തലിന്റെയോ പുനരധിവാസത്തിന്റെയോ നിർജീവ വസ്തുക്കളായി കാണരുതെന്നും അവരുടെ താല്പര്യങ്ങളും സ്വയംഭരണാധികാരവും മാനിക്കപ്പെടണമെന്നും പറഞ്ഞു.
