കുടുംബം സഞ്ചരിച്ച ബൈക്കിൽ ലോറിയിടിച്ച് മൂന്നു പേർ മരിച്ചു.
ഹൈദരബാദ്: കുടുംബം സഞ്ചരിച്ച ബൈക്കിൽ ലോറിയിടിച്ച് മൂന്നു പേർ മരിച്ചു.ആറ് വയസ്സുകാരിക്ക് ഗുരുതര പരിക്ക് . ചൊവ്വാഴ്ച രാത്രി ചെവെല്ലയിലെ ഗൊല്ലപ്പള്ളി ഗ്രാമീണ റോഡിൽ ലോറി പിന്നിൽ നിന്ന് ഇടിച്ചതിനെത്തുടർന്നാണ് അപകടം
മൊയ്‌നാബാദ് മണ്ഡലത്തിലെ മെഡിപ്പള്ളി ഗ്രാമവാസികളായ കുമ്മരി മധു (33, തൊഴിലാളി), ഭാര്യ സാവിത്രി (28), ഇവരുടെ നാല് വയസ്സുള്ള മകൻ ധനുഷ് എന്നിവരാണ് മരിച്ചത്. അപകടത്തിൽ പരിക്കേറ്റ ഇവരുടെ ആറ് വയസ്സുള്ള മകൾ അക്ഷയയെ ചികിത്സയ്ക്കായി സർക്കാർ ആശുപത്രിയിലേക്ക് മാറ്റി.
പോലീസ് പറയുന്നതനുസരിച്ച്, ചെവെല്ലയിൽ നിന്ന് തങ്ങളുടെ ഗ്രാമത്തിലേക്ക് മോട്ടോർ സൈക്കിളിൽ സഞ്ചരിക്കുകയായിരുന്ന കുടുംബത്തെ രാത്രി 9.30-ഓടെ തിരിച്ചറിയാത്ത ഒരു ലോറി പിന്നിൽ നിന്ന് ഇടിക്കുകയായിരുന്നു. അപകടത്തിന് പിന്നാലെ ലോറി ഡ്രൈവർ സംഭവസ്ഥലത്തുനിന്ന് ഉടൻ തന്നെ രക്ഷപ്പെട്ടു.
അപകടത്തിൽ കുടുംബത്തിലെ മൂന്നുപേർ സംഭവസ്ഥലത്തുവെച്ചുതന്നെ മരിച്ചു; അക്ഷയക്ക് പരിക്കേറ്റു. മൃതദേഹങ്ങൾ പോസ്റ്റ്‌മോർട്ടത്തിനായി ചെവെല്ല സർക്കാർ ആശുപത്രിയിലെ മോർച്ചറിയിലേക്ക് മാറ്റി.
പോലീസ് കേസെടുക്കുകയും വാഹനത്തെയും ഡ്രൈവറെയും കണ്ടെത്താനായി അന്വേഷണം ആരംഭിക്കുകയും ചെയ്തു. ‘ഹിറ്റ് ആൻഡ് റൺ’ (ഇടിച്ച് നിർത്താതെ പോയ) സംഭവത്തിൽ ഉൾപ്പെട്ട ലോറി തിരിച്ചറിയുന്നതിനായി സമീപപ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ചുവരികയാണ്.
