കോഴിക്കോട് കൊയിലാണ്ടിയിൽ വാടകവീട്ടിൽ യുവാവ് കൊല്ലപ്പെട്ട നിലയിൽ; സുഹൃത്ത് സംശയത്തിൽ
കോഴിക്കോട്: കൊയിലാണ്ടിയിൽ യുവാവിനെ വാടകവീട്ടിൽ കൊല്ലപ്പെട്ട നിലയിൽ കണ്ടെത്തി. ഉള്ളിയേരി കന്നൂരിൽ ആക്രിക്കച്ചവടം നടത്തുന്ന തമിഴ്നാട് സ്വദേശി ഊമദുരൈ (42) ആണ് മരിച്ചത്. കൊയിലാണ്ടി മീത്തലക്കണ്ടി പള്ളിക്ക് പിൻവശത്തുള്ള വാടകവീട്ടിലാണ് സംഭവം നടന്നത്.
ബുധനാഴ്ച രാത്രി പതിനൊന്ന് മണിയോടെയാണ് കൊലപാതകം നടന്നതെന്നാണ് പോലീസിന്റെ പ്രാഥമിക നിഗമനം. ഊമദുരൈയും സുഹൃത്തുമായി രാത്രിയിലുണ്ടായ രൂക്ഷമായ വാക്കുതർക്കമാണ് കൊലപാതകത്തിൽ കലാശിച്ചതെന്നാണ് സംശയിക്കുന്നത്.
സംഭവത്തെക്കുറിച്ച് വിവരമറിഞ്ഞ് കൊയിലാണ്ടി പോലീസ് ഉദ്യോഗസ്ഥർ സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു. കൊലപാതകത്തിന് ശേഷം ഒളിവിൽ പോയതായി സംശയിക്കുന്ന സുഹൃത്തിനായുള്ള അന്വേഷണം പോലീസ് ഊർജ്ജിതമാക്കിയിട്ടുണ്ട്. പ്രദേശത്ത് വിരലടയാള വിദഗ്ധരും സയന്റിഫിക് ഉദ്യോഗസ്ഥരും പരിശോധന നടത്തും. കൂടുതൽ വിവരങ്ങൾ പോലീസ് അന്വേഷണത്തിന് ശേഷമേ വ്യക്തമാകൂ.
