യു.എ.ഇയിൽ 15 വയസ്സിന് താഴെയുള്ള കുട്ടികൾ സോഷ്യൽ മീഡിയ പ്ലാറ്റ്ഫോമുകൾ ഉപയോഗിക്കുന്നത് നിരോധിച്ചു
ദുബായ് : യു.എ.ഇയിൽ 15 വയസ്സിന് താഴെയുള്ള കുട്ടികൾ സോഷ്യൽ മീഡിയ പ്ലാറ്റ്ഫോമുകൾ ഉപയോഗിക്കുന്നത് നിരോധിച്ചുകൊണ്ട് യു.എ. കാബിനറ്റ് പുതിയ ഉത്തരവ് പുറപ്പെടുവിച്ചു.കുട്ടികളുടെ ഓൺലൈൻ സുരക്ഷ മുൻനിർത്തിയാണ് ഈ സുപ്രധാന തീരുമാനം.ഉത്തരവ് പ്രകാരം 15 വയസ്സിന് താഴെയുള്ള കുട്ടികൾക്ക് സോഷ്യൽ മീഡിയയിൽ സ്വന്തമായി അക്കൗണ്ടുകൾ ഉണ്ടാക്കാനോ അവ ഉപയോഗിക്കാനോ അനുമതിയുണ്ടായിരിക്കില്ല.15-നും 16-നും ഇടയിൽ പ്രായമുള്ള കുട്ടികൾക്ക് കർശനമായ രക്ഷാകർതൃ നിയന്ത്രണങ്ങളോടെയും, സമയപരിധിയോടെയും മാത്രമേ സോഷ്യൽ മീഡിയ ഉപയോഗിക്കാൻ അനുവാദമുള്ളൂ.സോഷ്യൽ മീഡിയ പ്ലാറ്റ്ഫോമുകൾ ഉപയോക്താക്കളുടെ പ്രായം കൃത്യമായി പരിശോധിക്കാൻ ബയോമെട്രിക് അല്ലെങ്കിൽ ഡിജിറ്റൽ ഐഡന്റിറ്റി പോലുള്ള ആധുനിക സംവിധാനങ്ങൾ ഉപയോഗിക്കും. വെറുതെ പ്രായം രേഖപ്പെടുത്തുന്ന രീതി (Self-declaration) ഇനി അനുവദിക്കില്ല.ഈ പുതിയ നിയമങ്ങളുമായി പൊരുത്തപ്പെടുന്നതിനായി സോഷ്യൽ മീഡിയ കമ്പനികൾക്ക് 12 മാസം വരെ സമയപരിധി അനുവദിച്ചിട്ടുണ്ട്. നിയമം ലംഘിക്കുന്ന പ്ലാറ്റ്ഫോമുകൾക്കെതിരെ മുന്നറിയിപ്പ് നൽകുകയോ അല്ലെങ്കിൽ അവ ഭാഗികമായോ പൂർണ്ണമായോ ബ്ലോക്ക് ചെയ്യുകയോ ഉൾപ്പെടെയുള്ള കർശന നടപടികൾ സ്വീകരിക്കുമെന്നും അധികൃതർ വ്യക്തമാക്കി.
